histouère de vache

Unne histouère de vache
Aux temps où j'va vous conter cette histouère j'étae gamine.
J'avae 9 ans et pour le CM2, je devae faire un exposé. C'étae en
féverier. J'avae chouési o ma copine, le sujet des vaches. Je n'savae pas
qu'o toutes les recherches que j'allins faire, j'allae m'attacher autant és
vaches. Quand je préparae mon exposé, j'devae aller souvent à la ferme
de Papa, et y avae biaucoup de naissances à cette période de l'année.
Donc dès qu'y'en avae un, il m'appelae su le portabe de ma mère.
Un sair, vers 10 heures où j'n'arrivae pas à dormi, mon père tae
aller à la ferme vair les viaùx qui taen malades. J'sé allée o li en pyjama. Y
avae un viaù. « C'est pas sûr qu'il vive » que disae mon père. Mon père li
donni unne pouchotée de médicaments pour le ghéri. En attendant qu'il
finissae son boulot, j'caressae le p'tit viaù là. J'm'étae attachée à ce
viaù. J'ai demandé à mon père si ça tae un mâle ou unne femelle. Il m'a
répondu que ça tae unne femelle et comme ça tae l'année des V, j'l'ae
nommé Vachette. J'sé allée unne semaine après, et le viaù tae tourjou là.
Dès que j'sé venue et que j'l'ae appelée, ol est venue. J'peux pas dire
comme j'tae benèse !!!
Unne semaine core après environ, y a zeù un vêlage de jumelles à 6
heures du sair. J'me souviens core que ça tae un jeudi. Le matin, pendant
que j'tae à l'école, y avae même zeù 2 jumeaux mâles. Mon père tae vra
benèse le jou là, 2 paires de jumiaùx, ça tae pas tous les jous qu'il avae
ela.
Pus Vachette grandissae, pus on 'tae complice.
Mais quand elle tae devenue core pus grande vers 1 an, quand je
l'appelae, o ne venae pus. Comme si o m'en voulae de pas aller la vair pus
souvent. Ela ne m'a pas découragée d'aller la vair.
Qhoques moués après, o tae devenue unne vache. Ol avae 2 ans à ce
moment là. Mon père, quand il la trayae, il disae qu'au début, ça tae pas
facile. Et j'sae que quand il disae qu'ça tae pas facile, je savae qu'il
tapaie o son bâton dica qu'o se calme un p'tit et se laisse traire. J'avae
déjà vu ela et j'en avae déjà pleuré.
Mais, à son deuxième vêlage, mon père me dit qu'ol avae zeù la
maladie du pis de sa mère. O faisae des mammites. A sa 4 ème lactation,
Papa m'a dit qu'o partirae à l'abbatoèr. Pour la vair unne dernière fais,
j'avae 14 ans, je décidi de la vair le jou de l'embarquement dans le
camion. Mais je crès que j'aurais jamais dû y aller ! J'l'ae veùsse
m'ergarder unne dernière fais. Ol essayae de passer sous la hèche pour
rejoindre les aùtes vaches. Ol avae des larmes qui coulaen et o meuglae en
m'ergardant. Comme si o me disae de l'aïder et de me souveni de toutes
nos éqeroéys. Je veyae le marchand de vaches taper dessus pour la faire
entrer dans le camion. J'avae du deù, ça tae dûr ! Mais ol a fini par entrer
au bout d'un bon quart d'heure qui parrassae long.
Je sé sure que je garderae tourjou cette vache dans ma mémouère à
caùse que je crés que je n'aurae pus jamais de souvenirs aussi forts o
unne vache.
Cathline MACE
Concours d'écriture MLB mai 2010
Vocabulaire:
unne pouchotée: un sachet
benèse: content
la hèche: la barrière
des éqeroéys: des aventures