1998 Exam – Question 12 (c) Quant li rois entent ceste parole, il se

1998 Exam – Question 12 (c)
5
10
15
20
Quant li rois entent ceste parole, il se dresce a peinne, comme cil qui
estoit pesanz por ses armes; il prent Lucan qui desarmez estoit et l’embrace et
l’estraint, si qu’il li crieve le cuer el ventre, si qu’onques ne li lut parole dire,
einz li parti l’ame del cors. Et quant li rois a grant piece esté ainsi, si le let, car il
ne cuide mie qu’il soit morz; quant Girflet l’a grant piece regardé et il vit qu’il
ne se remouvoit, il aperçoit bien qu’il est morz et que li rois l’a ocis; si
recommence son duel et dit: ‘Ha! sire, com vos avez mal fet qui Lucan avez
mort!’ Et quant li rois l’entent, si tressaut et regarde entor soi et voit son
bouteillier gesir mort a terre, et lors croist son duel et respont a Girflet en
semblant d’om corroucié: ‘Girflet, Fortune qui m’a esté mere jusque ci, et or
m’est devenue marrastre, me fet user le remenant de ma vie en douleur et en
corrouz et en tristesce.’ Et lors dist a Girflet qu’il meïst les frains et les seles; et
cil si fet. Li rois monte et chavauche vers la mer tant qu’il i est a eure de midi;
se descent a la rive et desceint l’espee d’entor lui et la tret del fuerre; et quant il
l’ot esgardee grant piece, si dist: ‘Ha! Escalibor, bone espee et riche, la meilleur
de cest siecle, fors cele as Estranges Renges, or perdras tu ton mestre; ou
retroveras tu home ou tu soies si bien emploiee conme en moi, se tu ne viens es
mains Lancelot? Hé! Lancelot, li plus preudom del monde et li mieudres
chevaliers, pleüst ore a Jhesu Crist que vos la tenissiez et ge le seüsse! Certes
m’ame en seroit plus a ese a touz jorz mes.’ Lors apele li rois Girflet et li dist:
‘Alez en cel tertre ou vos trouveroiz un lac et gitez m’espee la dedenz, car je ne voil
pas qu’ele remaingne en cest reingne, que li malvés oir qui i remeindront
n’en soient sesi. – Sire, fet il, ge ferai vostre commandement, mes encore
volsisse ge mieuz, s’il vos pleüst, que vos la me donnissiez.’
La Mort le roi Artu