On djoû d` fièsse... Li rintréye, c`èst po quand, maîsse ? Tos lès côps

On djoû d' fièsse...
Li rintréye, c'èst po quand, maîsse ?
Tos lès côps qu' nos rèscontrans on soçon d' nosse sicole, c'èst todi l' min.me quèsse:
"C'èst quand, au jusse, li rintréye, maîsse ?"
Et nos l'zî rèspondans, à chaque côp, qu' c'èst l' prumî djudi d'octôbe, come tos l's-ans,
dispû one apéye. One rèsponse qu'i conèchenut bin d'avance, mins qu'i laîyenut voltî
moussî dins leûs choûtwès. Come si ça ravancereut one miète li date qu'on ratind.
Ane-Marîye riwèt sès régues di grammaîre. Chantal sét d'dja bin qu'èlle aurè dès novias
scrîjeûs.
Çu qu'i n' savenut quétefîye nin, c'èst qu' lès maîsses aprèstéyenut leûs novias cayèts. Il
ont l'abitude di r'veûy dès-èlèves qu'èstint d'dja là l'anéye di d'vant. Ça faît qu'i l'zî faut
aprèster do novia.
Nosse Pôl rabiazit s' coûrs one miète tos l's-ans, po lî d'ner l' coleûr qui r'lûrè l' mia dins
s' sicole. Po l' rintréye, i va jusqu'à aprèster dès novèlès gougouyes.
Di tos costés, c'èst lès côps d' tèlèfones po v'nu aus novèles. Li site, c'èst tos lès djoûs
qu'on l' vint veûy po yèsse sûr di n' si nin brouyî.
Ça nos faît plaîji d' sawè qu'i-gn-a todi d' pus d' soçons à v'lu aprinde nosse bia lingadje
èt l' causer avou leûs djins.
Oyi, li rintréye, c'èst l' djudi 7 d'octôbe. Ci djoû-la, po nos-ôtes tortos, ci sèrè d'dja ... on
djoû d' fièsse.
Lucien SOMME
www.ecoledewallon.be