A-cause le chate l`Ile-de-Man na point de queue

A-cause le chate l'Ile-de-Man na point de queue
Extrait du 7 Lames la Mer
http://7lameslamer.net/a-cause-le-chate-l-ile-de-man-na-1673.html
Zistoire dehors, vidéo
A-cause le chate l'Ile-de-Man
na point de queue
- Lames de fond - Zistoir dedan / Zistoir déor -
Date de mise en ligne : mercredi 23 décembre 2015
Description :
Sa in zistoire i sorte en Angleterre, dans inn île i appelle l'Ile-de-Man. L'Ile-de-Man st'inn île dans la mer d'Irlann, rente l'Angleterre ec l'Irlann. L'Ile-de-Man lé
pas bien grand, li fait moins de 600 km2, li lé quate fois plus petit que la Réunion. Et li na rien que 80.000 zabitant. Dans l'Ile-de-Man na inn race le chate, i
appelle manx, inn race le chate na point de queue. Et à-cause sa ?
Copyright © 7 Lames la Mer - Tous droits réservés
Copyright © 7 Lames la Mer
Page 1/5
A-cause le chate l'Ile-de-Man na point de queue
Sa in zistoire i sorte en Angleterre, dans inn île i appelle l'Ile-de-Man. L'Ile-de-Man st'inn île
dans la mer d'Irlann, rente l'Angleterre ec l'Irlann. L'Ile-de-Man lé pas bien grand, li fait
moins de 600 km2, li lé quate fois plus petit que la Réunion. Et li na rien que 80.000 zabitant.
Dans l'Ile-de-Man na inn race le chate, i appelle manx, inn race le chate na point de queue. Et
à-cause sa ?
Manx, by ResoundingMovement
A-cause inn race le chate sans queue ?
Na deux lesplication : in peu de monn i dit comme sa, sa té à-cause inn année l'hiver té tellement froid, bann
chate té i amuse trop pou rente dans la case, quand té i ferme la porte : zot queue té i traîne dehors, toute la chaleur
té i sorte. Alors pou économise le bois de chauffage, bann zabitant lavé coupe la queue zot chate. Comme sa, quand
té i ferme la case, la queue le mimite té i resse pas coincé dans la porte.
Mi croit pas trop ce zistoire. Pou moin le vrai raison la pas là. I faut armonte deux-trois mille-an avant Jésus-Christ,
pou connaîte le vrai zistoire. Dann temps-là, Bon Dieu té pas content ec le zomme su la Terre : le zomme té trop
méchant. Alors Bon Dieu la décide fait tonm la pluie pendant quarante jour ec quarante nuite, pou détruit toute de
moune ec toute zanimaux su la Terre : la appelle sa le déluge. Mais Bon Dieu la confié Noé inn mission...
Copyright © 7 Lames la Mer
Page 2/5
A-cause le chate l'Ile-de-Man na point de queue
Manx. Source : cat-paintings.com
— Noé, ou va fabrique inn arche en bois de résine, ou va mette bitume par dehors et par dedans. L'arche va
mesure trois-cent coudée en longueur, cinquante coudée en largeur et trente coudée en hauteur. L'arche nora trois
zétage et l'entrée sera su le côté.
Sa té i fait in lespèce grand bateau 137 mète de long, 26 mète de large et 16 mète de haut. Après-là, Bon Dieu la
dit comme sa :
— Noé, ou va rente dans l'arche, aou ec ote famille, ou va fait rente anndans toute bann zanimaux, in mâle ec inn
femelle chaque qualité. Dans sept jour, mi sar fait tonm la pluie pendant quarante jour ec quarante nuite.
Noé la fait comme Bon Dieu la dit ali : quand l'arche té fini, li la fait rente son famille, sa femme, son trois garçon
ec son trois belle-fille, zot té huit en tout. Après-là, Noé la fait rente toute bann zanimaux su la terre, in mâle ec inn
femelle chaque qualité : pou commencé navé bann giraffe, lion, zéléphant. Après, té le tour bann vache, mouton ec
cochon. Renard, lapin, zoiseau, sauterelle, fourmi. Le chien la rente en dernier. Ah oui, navé aussi le chate. Mais
navé rien qu'inn. Et le chate t'après court derrière inn souris. Arrive dann bateau, li té connaît li noré pu le droit
mange souris. Le mimite té en retard, Noé la criye le chate toute côté : inn tiork ! le chate té i présente pas.
— Tant pis pou li, la dit Noé, li navé qu'à ête là ! Mi peut pu attann : de l'eau i commence monté !
Copyright © 7 Lames la Mer
Page 3/5
A-cause le chate l'Ile-de-Man na point de queue
Dann bateau, té in vrai ralé-poussé : bann zanimaux té i rugit, té i bêle, té i grogne, té i aboye, chaquinn té i rode
son place. La prend le temps mais Noé ec son zenfant la ni à-bout mette l'orde. Après-là, Noé la parti ferme la porte :
li la guette in dernier coup pou oir si le chate té là : rien ! Zéro calebasse la fumée Grand-Bois ! Noé té fine mette la
main su la porte, alala le chate la déboulé en catastrophe, li la faufile anndans. Noé la claque la porte, et alala la
queue le chate la resse coincé ! Tellement bien coincé, la queue la resse dehors ! Le chate navé pu de queue !
— Mimite, aou-même l'auteur, la dit Noé, pas besoin pleuré, au-moins ou lé vivant ! Té pu l'heure pou court
derrière souris ! Va serve aou de leçon !
La pluie la tombé pendant quarante jour ec quarante nuite. L'eau la monté, la monté, la monté plus haut que la
montagne. Toute la terre té dann l'eau ; toute de monn lé mort, toute zanimaux, sauf Noé ec son famille, sauf son
cargaison de zanimaux. Quand la pluie l'arrête tombé, Noé la navigue encore pendant sept mois, jusqu'à-temps
l'arche la ni batte conte inn montagne : té le Mont Ararat, inn montagne i fait plus de 5.000 mète, rente la Turquie ec
l'Arménie. L'eau la commence baissé.
Noé la envoye in corbeau pou oir si navé inn place pou allé. Le corbeau la revenu bec vide : la Terre té toujours
sous-de-l'eau. Noé la envoye inn colonm : la colonm la revenu, navé point de place pou pose son patte. Noé la
attann encore sept jour, li la renvoye la colonm : ce coup-ci la colonm la revenu ec in brin de zolivier dans son bec.
Té l'heure pou débarqué. Bon Dieu la dit Noé comme-sa :
— Noé, zot lé sauvé, aou, ote femme ec ote famille. Fait sorte toute le bann zanimaux, zot va multiplié, zot va
repeupe la Terre.
Copyright © 7 Lames la Mer
Page 4/5
A-cause le chate l'Ile-de-Man na point de queue
Noé la rouve la porte : toute bann zanimaux la débarqué, deux par deux. Le chate té dernier, jusse après le
chien. Le chate lavé honte, li navé point de queue ! Le chate la parti cachette dans l'Ile-de-Man, rente l'Angleterre ec
l'Irlann. Comme sa-même la fait que toute bann chate su l'Ile-de-Man na point de queue. St'inn race spéciale, i
appelle manx, i trouve rien que su l'Ile-de-Man. Le chate l'Ile-de-Man st'in bon chate, affectueux, et li st'in bon
chasseur de souris.
Coméla, bann chate l'Ile-de-Man la pu honte : zot lé rare, et zot i connaît le dicton : toute sak lé rare lé cher, donc
zot lé cher ! Coméla le chate l'Ile-de-Man lé fier !
Jean-Claude Legros
Copyright © 7 Lames la Mer
Page 5/5