A ulfu fell-i ur di al, lemmer ul-iw deg-s ur yeccig. Γas ur k
Transcription
A ulfu fell-i ur di al, lemmer ul-iw deg-s ur yeccig. Γas ur k
Aḥulfu fell-i ur d-iḍal, lemmer ul-iw deg-s ur yeccig. Γas ur k-nettarra areṭṭal, netteḥnuccuḍ, allaγ yesriffig. Ulac win ur nettwamḍal, kečč deg uẓekka udem-ik ur yedrig. Ijeğğigen akk umaḍal yuzen-ak-ten-in wul s inig. Tunageḍ, maca,telliḍ, yal tiγilt a k-id-nebder. Ẓriγ, neẓra yakk teẓriḍ isem-ik d lebda ad yedder. Ma yella s tidet ssneγ-k, nṭeq ay ul asusam: Riγ kan a d-iniγ ḥemmleγ-k, ḥemmleγ-k ah ya ddin qessam!!! Asisen seg tamment-ik ay amdan igerrzen Γef Tğilbant yekfa imeṭṭi, sseεd-is yekker, deg-neγ ulac anwa ur newhim. Tezweğ yakk d Wejṭuṭṭi, sεan-d aqcic d agayar, yugar jeddi Yebrahim. Mi ara testeqsayem, ma d ayen yelhan neγ d ayen ndir. Tebγam ad teẓrem? tterğem-asen a ssi Tadir! -------------------------Ssi Qasi ur t-nurğa iεedda-d, iberreḥ ur newhim. Bu ukamyun n leγbar ata yusa-d, anida-t jeddi Yebrahim? Ğğiγ-ten-in la zellun, di lḥara n wadda i yella. Ssiwel-as kan a Σli n Dulun, skud ur iṣubb γer tala! Ali γef teẓrut ssiwel-as, atan deg ubalkun wali-t! Akken ur yettaṭṭaf tasa-s, ẓwer-k ihi ssefhem-as, ini-yas mačči d tacbaylit! Terwi ma terreẓ! Fiḥel ad as-d-tebduḍ macahu! Yid-s ad ineggez, Maître Budima Meεεahu. -------------------Nekk γileγ tεedda ssmana, Budima Meεεahu yuγal. Steqsaγ fell-as Ḥlima n tala, aṭas aya ur t-temlal. Steqsaγ ula d Smina n Tazart, ula d nettat ur t-temlal. Γer ddaw tulmut ḍegger allen-ik, ajernan n le monde yessa! Azzel a Wejjiṛ s yixef-ik ẓer kan la date ma n wass-a! Kečč tura aγ-d li zagṛaf, mi ara d-yuγal ssi Qasi! I jeddi Briruc anida ar d at-naf? Bu ukamyun atan yezεef, awi-t ad yečč imensi! Ad kemmleγ abrid, ad rzuγ γef ssi Funi. Ma yella kra n wejdid, wissen kan d acu ar a d-yini? -----------------------Γas ssi Funi werğin yeṭṭiṣ, tikkelt-a yenger. Yenna: Lεeslama-k a lkumirṣ! Akka i d iyi-d-yemmuger. A ssi Funi nεel cciṭan! A t-yexzu Rebbi yenεel-it. Ktil s ttawil lkettan, akubu-yagi gzem-it! Ad gezmeγ ddin Rebbi-k, γur-k ad iyi-d-tcekkreḍ baba! Tamussni-s d uḍeggal-ik, balak a d-teffeγ seg yimi-k neγ a d-tiniḍ " bu kuskus yewwa"! Abbuh ttwakellxeγ, idrimen n dahi ur d-ṭṭneṭnen! Cclaγem-iw berneγ, s lalla Mjilat i iyi-ten-seṭṭlen! ---------------------Ger yemdanen issin, beṭṭu, ah ya ssi Funi! Lalla Mjilat tezweğ d ubugaṭu, ma yiwen ur ak-yenni. Wa ssneγ-t d ssi Nistri, cfiγ d acu i d iyi-yenna. Yeγra am wakken ur yeγri di lğameε n zzituna. Nekk cukkeγ yerwi leεqel-ik, d tidet tselbeḍ tura. Ssi Funi tebbet iman-ik, εiwed ḥseb ikarṭunen-ik, widak teğğiḍ di berra! D yelli-s n wedrum-ik, aha beddel awal dayen! Yak walant wallen-ik, argaz yekcem εemrayen. Tebγiḍ a d-tiniḍ yeskeṛ? Netta lwiski ur t-yeswi. Ma yeγra di lğameε n el azheṛ, nekk d le Médecin malgré lui. ---------------------------S akridi teddmeḍ-d leqlam, rnu mitin-uxemsin-alef-nni! Neγ aqerru-k yettemsalam d cciṭan yenγa Xumayni? I wemrabeḍ-nni n teṛwazyam, nnan-as akka leqbellec: Telsiḍ-d aqadum n lislam, mi keččini d yir limam, i netta amek i sen-yeqdec? Itess sidi Brahim itett. yemḍel takna n yemma-s werbib. Yessawel-asen-d yakk tidet, umnen-t asmi yeskiddib. --------------Iban akka, ula d asmi nettεeggiḍ, neqqar ulac ssmaḥ, ulac, tfaqeḍ-aγ a Muḥya. Sliγ tenniḍ fell-aγ ayagi: Librubru, amzun yella anwa i d asen-yennan semmḥet-iyi. Mačči d yiwet i d-tenniḍ, mačči d yiwet a d-tiniḍ, aql-aγ nettrağu a d-yeffeγ ugerruj-nni i d aγ-d-teğğiḍ. Ini-yi-d a Muḥya ttxil-k, ini-yi-d! Yak ḥlaw ṣṣut-inu? Ad taγeḍ ddisk-inu? Nekkni s librubru yeddren mmuten, nessared allen-nneγ s uγebbar. Tamussni γur-k i tt-nessen, allaγ-ik ur yesqudeṛ. A mmi-s n lεerc Ibudraren, drus akk wayen a k-d-nehder. Aql-ak seg widak yeddren, zdat-neγ tamuγli-k tezwar. Ssawlen-iyi-d lγaci, seg ugemmaḍ sliγ-d i usuγu. Ulayγer akk ma nnan-iyi, ḥṣiγ s wayen ad yeḍru. Ay ul-iw yekfa unecraḥ, ajgu alemmas yeγli yeẓẓel. nemḍel-it deg at Rbaḥ, idles-nneγ yeggujel. D kečč i d asirem n tlelli n tirga yezzuzunen ulawen. Yes-k i nemmuger iḍelli, i s-d-nerẓa isula i usawen. Γef tεekkazt-ik mi nettekka, negzem-d leqyud i γ-icekklen. Yejmeε-ik ur k-yeffir uẓekka, axxam-ik zdat wallen. Zdat wallen-nneγ tbeddeḍ, ger ifassen-ik teṭṭfeḍ tafat. Ur tezmireḍ ara ad temmteḍ, s yes-k abrid nwala-t. Si Dzayer γer Tizi beddeγ, mazal lxir γer zdat. Di teqreεtin akk fukeγ, yegra-d lemrar n winnat. S ibeddi rekbeγ swiγ, ur ifuk lemrar n winnat. D ameẓẓuγ i d ak-fkiγ, ḍeggreγ asurif γer zdat. Izmawen n Skikda ur ten-ugadeγ, yeffeγ-d εeẓrayen nwala-t. Abbuh a Muḥya, rfed-aγ, seg uẓekka-k nurğa tafat! Ur teğğiḍ medden ad ṭṭṣen, lfuci-k isem-is imi. Γas mi k-slan ad ḍṣen, ulawen bubben ccwami. Iqjan yes-k i ten-nessen, ifen-aγ, temliḍ-aγ acimi. Ttmeslayen s tutlayt-nsen, mačči s taεrabt a mimmi. S inaẓuren a tiselbi, s kra i d aγ-tefkiḍ inem. Nesserwat yiwen ur aγ-yettsibbi, win nettagad yessusem. Yeğğa-yaγ nettrağu Rebbi, akken i d aγ-yehwa nexdem. Yeṭṭerḍeq wul seg ibibbi, nṭeq ah ya ddin qessam!!! Winna icennun yettazen leḍyur, nekkni nettazen itbiren. Afurek d-yessekna yeqqur, yerreẓ yesderγel-as allen. Ini-yas i win yewwi-k leγrur “ẓer aweryan n izarismen”! Ma yella ifrax d leḍyur, i yetbiren d acu-ten? Ssres iγsan-ik di talwit, γur-k swan widak yeffuden! I isufa-k neḥrez tirgit, ur ttagad mačči d iγiγden. Yiwen wass ad teffeγ targit, ad nerfed aqerru zdat medden. D tadsimant neγ d timanit, ulawen akk γur-s icudden. Ssres iγsan-ik di talwit, ẓẓrubat yes-k i rrẓen! Ssres iγsan-ik di talwit, aẓekka deg wul i k-teγzen! Ssres iγsan-ik di talwit, kečč ay amdan igerrzen! Kečč ay amdan igerrzen, ssres iγsan-ik di talwit! Sεid At Mεemmer