Lir Diskour Antye - Parti Lepep Parti Lepep

Lir Diskour Antye - Parti Lepep Parti Lepep

NOU PREZIDAN IN TRAVAY !!!
Mon ti annan 2an ler nou Parti ti fonde an 1964 par Prezidan Rene. Mon papa ki sa letan ti pe travay
Uganda ti bezwen fer sakrifis pour anvoy larzan Sesel pour kontribye dan fon nou Parti. Mon manman ti
travay pandan 12an koman Sekreter dan Biro Brans Anse Royale.
Tanto mon komans mon diskour dan sa fason akoz mwan, zanfan de militan, ki ‘n milite e fer sakrifis pou
nou Parti. Sa lannen, i fer egzakteman 30an depi ki mon’n retourn Sesel apre mon letid Cuba.
Mon debout fyer koman sa zanfan Parti SPUP, SPPF. Mon debout fyer koman en dirizan Parti Lepep
ozordi. Mon la. Mon pou touzour la avek Parti Lepep. Mon pou pran mon dernyen soupir dan Parti
Lepep.
Prezidan Michel, mersi pour donn mwan en lot loportinite pour debout akote ou pour reprezant nou
Parti dan prosen eleksyon koman ou kandida Vis Prezidansyel.
Mon dir ou mersi pour konfyans ki ou’n touzour annan dan mwan pour kontinyen travay akote ou, pour
nou kontinyen pran swen avek nou pep, nou nasyon e nou pei Sesel.
Nou konnen kote nou sorti. Nou konnen kote nou été ozordi. Nou konnen kote nou pe ale. Nou priyorite
se byennet lepep, byennet lepep, byennet lepep.
Prezidan nou Parti i bezwsen ou pour kontinyen anmenn sa transformasyon pour dibyen nou pep, pour
boner nou pep e pour benefis nou pep. Nou Parti i bezwen ou pour anmenn Sesel lo sa lot letap dan son
devlopman. Nou annan konfyans dan ou abilite e kapasite pour kontinyen diriz Sesel e Nasyon Seselwa.
Nou sipor pour ou i la. Mon sipor pour ou i la.
Prezidan, zanmen ou’n dir ki ou en sen. Ou ti dir ki ou pou travay dir. E travay dir ou’n travay Msye
Prezidan !!!! Travay i lo la. Rezilta osi i lo la. Rezerv dan labank Santral in doublew pou sorti 250 milyon
dolar an 2011 pour vin 507 milyon dolar an Me 2015.
Sa i rezerv pour protez nou pep kont okenn gran sok lo nou lekonomi ki pou annan lenpakt negatif lo lavi
nou pep. Sa rezerv i pou pep Seselwa. Nou lekonomi in agrandir. Parey nou kontan dir, nou’n fer grosir
nou gato nasyonal.
An 2011 groser nou lekonomi ti 13 bilyon roupi e an 2015 nou pe prozekte li vin 19.5 bilyon roupi. Sa i en
logmantasyon 48%. Nou’n travay, nou pep in travay, nou Prezidan in travay.
Prezidan Michel in kontinyen reste senser ek nou prensip e progranm pour met nou pep o sant nou
devlopman. Anba son direksyon an 2011, 1.2 bilyon roupi dan Bidze Naysonal ti al zis pour sekter
lasante, ledikasyon, sosyal, devlopman kominoter, lakaz e progranm benefisy sosyal.
An 2015, pour menm sekter nou pe depans 1.8 bilyon roupi. Sa i reprezant en logmantasyon 43%.
Nou’n travay. Nou pep in travay. Nou Prezidan in travay.
Lalis rezilta travay ki’n ganny akonpli zis dan sa peryod 4an ki’n pase i tre long. I’n en peryod kot Sesel in
fer en progre remarkab e lidership Prezidan Michel in vreman ekstraordiner. Lemonn osi, i rekonnet
travay Prezidan Michel.
Ler bokou dan sa kwen lemonn ti sou-estim menas piratri, Prezidan Michel ti premye pour sonn laklos. I
ti pran mezir legal. I ti ranforsi nou sekirite entern pour protez tou Seselwa e nou pei Sesel. I pa ti aret la.
I ti mobiliz kominote enternasyonal pour ogmant zot lafors militar dan larezyon avek bi anmenn en lager
kont piratri. Larealite ozordi i koz pour limenm.
Ozordi Prezidan Michel i en pionye lekonomi ble. I’n donn en lot perspektiv devlopman resours ki nou
lanmer i posede pour benefis nou pep.
Nasyon ziz ozordi i rekonnet lidership Prezidan Michel an sa ki konsern devlopman soutenab. Prezidan i
en vre defanser drwa pour tou pep bann pti leta pour zot legzistans e pour zot sirviv dan en monn
menase par sanzman klimatik.
Rikord e rezilta travay Prezidan Michel i koz pour imen e nou Parti Lepep nou rekonnet e nou fyer son
travay. Resaman nou ganny dir ki gouvernman Prezidan Michel i koronpi. Me dir mwan, si vreman nou ti
koronpi, eski IMF ti pou prêt Sesel 20.4 milyon dolar ? Eski Labank Mondyal ti pou prêt Sesel 7 milyon
dolar ?
Eski Labank Afriken pour Devlopman ti pou prêt Sesel 10 milyon dolar ? An tou 37. 4 milyon dolar zis dan
lannen 2014 ?
Si vreman nou gouvernman ti koronpi eski nou ti pou demann Linyon Eropeen pour fer en lodit lo nou
sistenm zesyon finansman piblik ?
Mwan, mon konn sa tre byen. Tou pei kil o en progranm parey Sesel, si zanmen koripsyon i ganny
detekte e etabli, sa pei i ganny met lo sanksyon e sa loan i ganny kennsel toudswit.
Sesel i lo en bon semen. Sesel i dan en bon lanmen. Annou kontinyen regard lavenir avek loptimizm.
Mwan, mon annan konfyans dan nou lavenir.
Mon demann nou tou, pour nou ralye deryer Prezidan Michel. Sa zonm ki’n dedye son lavi o servis nou
pep e Sesel. Sa Zonm ki pli determinen ki zanmen pour anmenn Sesel e pep Seselwa ankor pli lwen.
Militan Lepep, mersi pour zot sipor, mersi pour zot sakrifis, mersi pour zot lwayote dan prensip nou
Parti. Nou reste fondamantalman en gouvernman lepep, pour lepep e par lepep.
Pouvwar i pour nou.
Avek Prezidan Michel, laviktwar i pour nou.
Ankor enn fwa nou pou sorti venker !!