ibaruwa y`umwepiskopi wa ruhengeri isoza umwaka wa yubile y
Transcription
ibaruwa y`umwepiskopi wa ruhengeri isoza umwaka wa yubile y
IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA DUSOZE UMWAKA W’IMPUHWE Z’IMANA TURUSHAHO KUZIRINGIRA NO KWITABIRA IBIKORWA BYAZO Ku wa 20 Ugushyingo 2016 1 2 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA DUSOZE UMWAKA W’IMPUHWE Z’IMANA TURUSHAHO KUZIRINGIRA NO KWITABIRA IBIKORWA BYAZO Ku wa 20 Ugushyingo 2016 3 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA 4 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA I. Iriburiro Basaseridoti, Bihayimana, Bakristu, Bavandimwe, 1. Kuri iyi tariki ya 20 Ugushyingo 2016, duhimbazaho Umunsi mukuru wa Kristu Umwami, ari na wo usoza umwaka wa liturjiya, nibwo Kiliziya isoza ku mugaragaro Umwaka w’Impuhwe z’Imana watangajwe muri Kiliziya na Nyirubutungane Papa Fransisko, ugatangira ku mugaragaro ku itariki ya 8 Ukuboza 2015, ku munsi mukuru wa Bikira Mariya utasamanywe icyaha. Insanganyamatsiko yawo yagiraga iti: « Nimube abanyampuhwe nk’uko So ari Umunyampuhwe » (Lk 6, 36). Ashyiraho uwo mwaka, Nyirubutungane Papa yifuzaga ko haba Yubile idasanzwe y’Impuhwe z’Imana, abantu bagafata igihe bakarangamira Yezu Kristu, We Shusho nyakuri y’impuhwe z’Imana, kugira ngo babe ibimenyetso bifatika by’imigirire yayo. Yifuje kandi ko cyaba igihe gikwiye kuri Kiliziya, aho ubuhamya bw’abemera burushaho kugira imbaraga kandi bukagaragarira bose.1 Yasabye ko muri buri Diyosezi umwepiskopi yagena ahafungurwa Umuryango w’Impuhwe, abakristu bakazawunyuramo baje mu rugendo nyobokamana mu buryo bufitanye isano no guhimbaza Yubile y’impuhwe z’Imana, bikaba ikimenyetso cya Kiliziya yunze ubumwe.2 Yifuje kandi ko muri uwo mwaka abakristu bashishikarira ku buryo bw’umwihariko ibikorwa by’impuhwe ku mubiri no kuri roho,3 ari na byo bituma ubukristu buva mu magambo bukajya mu bikorwa. 2. Amasomo matagatifu yo kuri uyu Munsi mukuru wa Kristu Umwami (2 Sam 5, 1-3; Kol 1, 12-20; Lk 23, 35-43) atugaragariza iby’ingoma ya Kristu, We Shusho ry’Imana itagaragara, We Mutwe w’umubiri ariwo Kiliziya, akaba ishingiro n’umuvukambere mu bapfuye bose. Ariko ubwami bwa Kristu, nk’uko Ivanjili ibitubwira, bugaragarira cyane cyane ku Musaraba, aho yatsindiye inabi akayiganjisha ineza, akaherekanira Impuhwe zihebuje ababarira igisambo kimwicujijeho akagisezeranya ihirwe ry’iteka. 2 Reba Ibaruwa Misericordiae Vultus (MV) (Ishusho y’Impuhwe) ya Nyirubutungane Papa Fransisko, itangaza ku mugaragaro Yubile idasanzwe y’Impuhwe z’Imana yo ku wa 11 Mata 2015, n. 1-3. M.V. n. 3. 3 M.V. n. 15. 1 5 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA Ku Musaraba, ni ho amarembo y’ubugingo bw’iteka yadukinguriwe, tubikesha Kristu Umushumba mwiza wemeye guhara ubugingo bwe agirira intama ze, bityo akagaragaza ku buryo busesuye ko Impuhwe ari yo sura nyakuri y’Imana yacu, zigahishura iyobera ry’Ubutatu butagatifu.4 Uwo Kristu Umwami w’Impuhwe niwe tumaze umwaka wose turangamiye ku buryo bw’umwihariko. II. Ibyagezweho mu mwaka wa yubile y’Impuhwe z’Imana 3. Bakristu bavandimwe, ku itariki ya 13 Ukuboza 2015 nibwo twafunguye umwaka w’impuhwe i Rwaza nka Paruwasi ya mbere muri Diyosezi yacu, dutaha na shapeli y’urwibutso rw’iyogezabutumwa yubatswe muri iyo Paruwasi. Ku itariki ya 20 Ukuboza 2015, twafunguye undi muryango w’impuhwe ku Ngoro ya Bikira Mariya Umwamikazi wa Fatima mu Ruhengeri. Byari ukugira ngo abakristu babone ahantu hagenwe nk’uko Papa wacu yabyifuje maze baharonkere inema n’indulugensiya bibafasha guhinduka no kwakira impuhwe z’Imana. 4. Uyu mwaka wa yubile dusoje wabereye abakristu igihe gikwiye cyo kwivugurura no gucengera iyobera ry’urukundo rw’Imana ku buryo burushijeho. Ibyakozwe ni byinshi, nta wabirondora ngo abirangize. Hari ibyakozwe ku rwego rwa Diyosezi, mu rwego rwo guhimbaza Umwaka w’Impuhwe, hari n’ibyakozwe ku rwego rwa paruwasi, santarali, imiryango y’agisiyo gatolika, imiryangoremezo, amatsinda anyuranye cyangwa abantu ku giti cyabo. Iby’ingenzi muri byo ni ingendo nyobokamana, ibikorwa by’impuhwe, kugarukira amasakaramentu, guhugukira isengesho no kwivugurura mu bukristu. Ndashimira abakristu bose bitanze kugira ngo uyu mwaka w’Impuhwe dusoje were imbuto nyinshi nziza twishimira. 5. Muri uyu mwaka wa yubile idasanzwe y’impuhwe, abakristu bitabiriye ibikorwa by’impuhwe ku buryo bushimishije. Mu rwego rwa Diyosezi yacu ya Ruhengeri, twakoze urugendo nyobokamana i Kibeho, dusanga Umubyeyi w’impuhwe ngo atwigishe kurangamira Kristu, tunyura mu muryango w’impuhwe, kandi twibutswa ubutumwa bwo guhinduka no kugarukira Imana uwo Mubyeyi yatuzaniye. Dufite kandi amahirwe yo kugira muri Diyosezi yacu Paruwasi ya Gahunga yitiriwe Yezu Nyirimpuhwe. Muri uyu mwaka w’impuhwe, twakoreyeyo urugendo nyobokamana maze twiyambaza Yezu Nyirimpuhwe. Nifuje ko iyo Paruwasi yaba ihuriro ry’abiyambaza impuhwe z’Imana ku buryo 4 M.V. n. 3. 6 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA buhoraho, maze abakristu bakazajya bahagana kenshi hakabafasha gutura imitwaro y’ubuzima no gusabana na Yezu Nyirimpuhwe. Uretse izo ngendo nyobokamana zombi zakozwe ku rwego rwa Diyosezi, izindi ngendo nkazo zakozwe n’amaparuwasi cyangwa amatsinda y’abakristu berekeza i Rwaza cyangwa ku Ngoro ya Bikira Mariya Umwamikazi wa Fatima, banyura mu Muryango w’Impuhwe kandi bahabwa inyigisho. Muri izo ngendo ntagatifu, abakristu bahawe inyigisho zijyanye n’urukundo nyampuhwe ruturuka ku Mana, kandi rugomba kugaragarizwa abavandimwe bacu, cyane cyane abababaye. Turishimira ko muri uyu mwaka dusoje, abakristu benshi bari baragiye kure y’Imana bigoroye na yo, bitabira ku buryo bugaragara Isakaramentu rya Penetensiya, abandi bari barataye bagarukira amasakaramentu. Ku bijyanye n’isengesho kandi, uyu mwaka wa yubile y’impuhwe z’Imana udusigiye ibakwe mu kurangamira Yezu Nyirimpuhwe mu isakaramentu ry’Ukarisitiya. Turishimira ko hirya no hino mu maparuwasi ya Diyosezi yacu hashyizweho amasaha ndetse n’iminsi ihoraho abakristu bahuriraho maze bagashengerera Isakaramentu Ritagatifu. Ni ngombwa kwibutsa ko iyo migenzo myiza mbonezamana itagomba kurangirana n’umwaka w’impuhwe, ahubwo ko igomba gukomeza kuko ari yo ifasha abakristu guhamya ibirindiro mu Kwemera kwabo. Hari kandi ibikorwa byita ku mubiri ari byo: gufungurira abashonji, guha icyo kunywa abafite inyota, kwambika abambaye ubusa, gucumbikira abagenzi, gusura abarwayi, gusura imfungwa no gushyingura abitabye Imana. Hirya y’ibyo bikorwa byita ku mubiri, hakozwe nanone ibikorwa by’impuhwe byita kuri roho: kugira inama abashidikanya, kwigisha abatajijukiwe, kuburira abanyabyaha, guhoza abababaye, kubabarira abaducumuyeho, kwihanganira abatubangamiye ndetse no gusabira abazima n’abapfuye.5 Muri urwo rwego, abakristu ba Diyosezi ya Ruhengeri bagaragaje ubwitange mu gutabara abahuye n’ibiza binyuranye akarere kacu kanyuzemo kubera imvura, bigashegesha cyane cyane abo mu Karere ka Gakenke, bafasha abakene babashyikiriza ibiribwa, imyambaro, ibikoresho byo mu rugo n’ibindi. Bamwe muri bo kandi barubakiwe, abandi barihirwa ubwishingizi mu kwivuza, abandi barihirwa amashuri. Abarwayi bitaweho ku buryo butandukanye bahabwa amasakaramentu, bagezwaho ibiribwa n’izindi mfashanyo bari bakeneye. Abagororwa n’imfungwa barasuwe, bahabwa amasakaramentu n’izindi mfashanyo. Ku buryo bw’umwihariko muri urwo rwego, Diyosezi yacu yubakiye imfungwa n’abagororwa ba 5 M.V. n. 15. 7 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA Gereza ya Musanze ahantu ho gusengera, kugira ngo bagire aho bahurira n’Imana bisanzuye. Yezu ati “Nari imbohe, muza kundeba” (Mt 25, 36). Ndabashimira mwese mbikuye ku mutima uruhare mwagize muri ibyo bikorwa. Ndabifuriza ko byakomeza kubaranga. 6. Muri uyu mwaka w’impuhwe dusoje kandi, nibwo twatashye ku mugaragaro Kiliziya nshya ya Paruwasi Katedrali Mwamikazi wa Fatima mu Ruhengeri, twiyubakiye mu gihe gito, tubifashijwemo n’Imana. Nyagasani Nyirimpuhwe nasingirizwe icyo gikorwa cy’ingirakamaro yadushoboje, tukabasha kugisoza mu mwaka w’impuhwe, kuko cyaduhishuriye ubushobozi twifitemo, ariko kinatwibutsa ko abagiye inama nziza, iteka Imana irabasanga. Iyo Ngoro yubatswe ari urwibutso rwa yubile y’imyaka 50 Diyosezi yacu imaze ishinzwe, nayo ni ahantu hatagatifu tuzajya duhurira n’impuhwe z’Imana mu buryo bunyuranye. Mboneyeho kongera gushimira buri wese witanze kugira ngo icyo gikorwa twese twishimira kigere ku musozo. 7. Mu rwego rwo gusingira ikenurabushyo rifasha abakristu gushora imizi muri Kristu, guhuza ingufu no kunoza imikorere n’imikoranire, Imana yadufashije gutunganya « Centre Pastoral Bon Pasteur » twafunguye ku mugaragaro ku itariki ya 27 Nzeri 2016. Aho akaba ariho hahurijwe servisi zose za Diyosezi. Bizorohera buri wese guhabwa ubufasha yifuza atagombye gushakisha aho serivisi ku rwego rwa Diyosezi zitangirwa. 8. N’ubwo uyu mwaka w’impuhwe dusoje weze imbuto nyinshi nk’uko tumaze kubibona, ntihabuze ibitaragenze neza nk’uko twabyifuzaga. Guhindukirira urukundo nyampuhwe rw’Imana itifuza ko umunyabyaha apfa, ahubwo ko ahinduka akabaho (Reba Ez 18, 23), ntabwo byakiriwe na bose. Hari abatarumvise iyo Nkuru Nziza, bakomeza kwibera kure y’Imana ndetse na kure y’abavandimwe babo. Hari abagitsimbaraye ku migenzereze ya gipagani ivuguruza bikomeye ubuzima bwa gikristu nyakuri, abajarajara mu Kwemera birukira aho babarangiye umukiro hose, ahashobotse n’ahadashobotse, bakihakana Batisimu bahawe, ari nako baca intege abandi mu Kwemera. Muri iki gihe dusoza umwaka w’impuhwe, bene abo bana ba Kiliziya bayiteye umugongo ntibabura kuduhangayikisha no kutwibutsa ko dufite inshingano yo kubakoraho ubutumwa bubagarura mu gikumba cya Kristu, we Mushumba mwiza witangira intama ze (Reba Yh 10, 11-16). Kuba hakiri benshi mu bana ba Kiliziya batannye, abandi bakaba bagenda batera umugongo Inkuru Nziza y’umukiro nyakuri, bitwumvishe ko Ukwemera twakiriye ari isaro ry’agaciro gakomeye 8 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA tugomba kwitaho, bityo tukaba tugifite urugendo rurerure rwo gukora kugira ngo natwe duhamye ibirenge mu Ukwemera, Ukwizera n’Urukundo twaronkeye muri Kiliziya. Pawulo mutagatifu intumwa ati “Uwibwira ko ahagaze, aritonde atagwa” (1 Kor 10, 12). III. Dufashijwe na Kristu Nyirimpuhwe, dukomeze urugendo 9. Basaseridoti, Bihayimana, Bakristu, Bavandimwe. Dushoje umwaka wa yubile idasanzwe y’impuhwe z’Imana, ariko urugendo rw’Ukwemera rurakomeje. Muri Diyosezi yacu, turusheho kwiringira impuhwe z’Imana no muri gahunda z’ikenurabushyo dushyize imbere muri iyi myaka itanu iri imbere, ndetse n’izakurikiraho. Imbaraga twavomye mu mwaka w’impuhwe, zidufashe gukaza umurego mu kwiyubakira Kiliziya, nk’ingingo nzima zuzuzanya mu miterere n’imikorere y’Umubiri wa Kristu. 10. Mu gihe dusoza uyu mwaka w’impuhwe, Kiliziya yo mu Rwanda irahimbaza Yubile y’imyaka 100 ishize habonetse abasaseridoti ba mbere kavukire aribo : Balitazari GAFUKU na Donati REBERAHO, baherewe ubusaseridoti i Kabgayi ku wa 7 Ukwakira 1917. Bakristu bavandimwe, ntimuyobewe uruhare rw’umusaseridoti mu butumwa bwa Kiliziya. Iyi yubile rero, ni ingabire ikomeye ije ikurikira iy’umwaka w’impuhwe. Nyagasani nasingirizwe ko ahora atuzigamiye ibyiza! Ndabashishikariza kwifatanya na Kiliziya yo mu Rwanda muri iyo yubile, cyane cyane musabira abasaseridoti banyu ngo barusheho kwitagatifuza bitangira batizigama ubutumwa bahamagariwe na Kristu muri Kiliziya ye. Ndabashimira kandi ku buryo bw’umwihariko, bakristu ba Diyosezi ya Ruhengeri, kubera ko hirya no hino mu maparuwasi mwasobanukiwe n’akamaro abasaseridoti banyu babafitiye mu kubahuza n’Imana, mukiyemeza kubafasha kurangiza neza ubutumwa bwabo, mubitaho mu bya ngombwa bakeneye kugira ngo ubwo butumwa bugende neza. Ibi bigaragaza urukundo mukunda abapadiri banyu ndetse na Kiliziya muri rusange. Mubishimirwe! Ndabashishikariza rero gukomeza iyo gahunda nziza mwatangiye, igaragaza ko mwateye intambwe mu gusobanukirwa n’icyo Kiliziya ari cyo, ndetse munarusheho. 9 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA 11. Ndifuza ko twese, nk’umuryango umwe w’abemera uri muri Diyosezi ya Ruhengeri, twakwinjira mu cyerekezo cyaguye cy’imyaka 20 twatangiye duhimbaza yubile y’imyaka 50 ya Diyosezi yacu, tukaba twaragitangiranye na gahunda y’ibikorwa tuzibandaho mu myaka 5 iri imbere. Mu kwiyemeza “gushora imizi muri Kristu” (Reba Kol 2, 7), twasanze ari ngombwa kurushaho kwegera abakristu, uko abasaseridoti bagenda biyongera. Ibi biradusaba guhuza imbaraga mu mpande zose. 12. Muri uyu mwaka w’ubutumwa twatangiye ku mugaragaro ku itariki ya 27 Nzeri 2016, tuzibanda cyane cyane ku ngingo eshatu: gahunda yo kwegera abakristu, iy’ikenurabushyo ry’ingo, n’iyo gushyigikira ibikorwa bifitanye isano n’umuhamagaro wo kwiyegurira Imana. Ndifuza ko ikenurabushyo ry’ingo ryakwitabwaho ku buryo bw’umwihariko, kuko Umuryango muri iki gihe wugarijwe n’ibyonnyi byinshi. Ndasaba abasaseridoti mu maparuwasi gushyiraho gahunda yihariye yo gukurikirana, kwigisha no kwita ku ngo, kuko urugo rwa gikristu ari yo Kiliziya y’ibanze. Nk’uko nabitangaje kandi, twatangiye urugendo rwo gushinga amaparuwasi mashya: Paruwasi ya Busengo izabyarwa na Janja, Paruwasi ya Murama izabyarwa na Busogo, na Paruwasi Kanaba izabyarwa na Nemba. Ndasaba abakristu bose n’abasaseridoti muri rusange, by’umwihariko abarebwa n’iyi gahunda kuko izabera mu turere baherereyemo, kuyigira iyabo, bakayigiramo uruhare rufatika. Nidushyira hamwe imbaraga, bizashoboka. Ntidukwiye gushidikanya, kuko ibyo twagezeho mu gihe gito gishize dufatanyije, byatweretse ko abagiye inama nziza Imana ibasanga! 13. Dusoje umwaka w’impuhwe mu rwego rwa Kiliziya y’isi yose, ariko dukomeje urugendo rwo kwiyambaza impuhwe z’Imana mu buzima bwacu bwa buri munsi. Kristu Umwami w’amahoro, akaba n’Umwami w’impuhwe, naganze mu mitima yacu. Tumukingurire imiryango y’ubuzima bwacu bwose, abwinjiremo, abushyiremo urumuri n’ibyishimo bikomoka ku mutsindo we. Mbaragije Bikira Mariya Umwamikazi wa Fatima kandi mbahaye umugisha. Ruhengeri, ku wa 20 Ugushyingo 2016 XVisenti HAROLIMANA Umushumba wa Diyosezi ya Ruhengeri 10 11 IBARUWA Y’UMWEPISKOPI WA RUHENGERI ISOZA UMWAKA WA YUBILE Y’IMPUHWE Z’IMANA MWAMIKAZI WA FATIMA UDUSABIRE! 12