Va doing jor pin i a haisl, iaz lebt pet miar lai a maisl. Viar mauern va

Va doing jor pin i a haisl,
iaz lebt pet miar lai a maisl.
Viar mauern va knott,
omanònder ist mer gabòcksn der bòlt.
Vil schintln as n mai‘ dòch,
za hòltn sa still a lònka lòt.
Za paun me a groasa mia,
de sai‘ austònnen en òlla de vria.
De knottn va der mai’ mauer
hòt òlla as n puckl trong der òrm pauer.
S gahilz van dòch kimmp van bòlt
ont s ist bèrt mear as s gòlt.
No souvl jor iaz rengk s oar,
dos sai‘ ver mi abia zachen ka tsicht oar.
I hòn mear bos zboahundert jor,
sèll as i tsechen hòn tanst song as ist nanket bor.
Vil kinder hòn i tsechen augea,
ont òlla ka der sèll tir aus gea.
I hòn gaheart lòchen on rearn,
ont mear as a vòrt gor beam.
Gor men de pin kloa’ ont òrm,
en de mai’na lait hòn òlbe gahòltn bòrm.
De lait as petn hom om en mai’heart,
sai’ òlla lengest unter de eart.
Oa’s no en ònder sai’sa òlla vort
ont i bin òlbe do as i bòrt.
I bòrt kinder as lòchen
ont lai bider de tschmach van kochen.
I bòrt lait as mèlchen de kia
ont as vèldern en òlla de vria.
Ober do kimmp nea’met zua,
i muass me lai leing en a rua.
De mai‘ tir òlbe nou zua
ont de mai’na mauern as vòlln zua.
Va doing jor pin i a haisl,
iaz lebt pet miar lai a maisl.
Per un bimbo morto neonato….
An engel en himmbl
Der Gòtter Hèar hòt mer gem bea‘ne zait,
ont asou is ver mearer lait.
As doi’ bèlt pin i bea’ne plim,
de zait van an puss as n hirn,
de zait za sechen va der mama de ang.
De zait za entschloven me en de sai’na òrm
as hom e gabellt hòltn ver òlbe bòrm.
De zait za varschtea as i hòn i aa an bèrt
a‘ne za sechen de vòrm va der bèlt.
De zait za hearn as de hom me òlla gearn
ont as en sai’ gadònk bar i òlbe zua kearn.
An engel hòt me vort
a‘ne as de mai’ mama hòt kinnt song koa bourt.
Ont an engel pin iaz i aa,
do en himmbl hòt s plòtz ver enk òndra aa.