Lazybones... - Rocking Club Dino
Transcription
Lazybones... - Rocking Club Dino
Sherlock Holmes - oder - Die Suche nach der Schrift Tja, äs het mi ja scho lang gwurmet, dass i nid ha usegfunge, wie dr Schriftzug vom Rocking Club Dino heisst. We mir doch zügle u plötzlich üses Logo sötte apasse, de muess me doch dä Schriftzug ha, oder!?! Irgend einisch hani de gnue gha u ha mi derhingerklemmt. Zersch hani mau hunderti vo Schriftzüg ufere SchrifteSite düregluegt. Nei, fautsch! I ha natürlich zauererscht miner Schrifte uf mim Compi düregluegt. Schliesslich hani ja äs paar hundert, oder tuusig? Henu, uf au Fäu hani dert nüt passends gfunge u ou uf mine zuesätzliche CD's het's nüt gha. Sider si scho äs paar Schtung verbi gsi, aber ä ächte Sherlock Holmes git ja nid eifach uf, oder!?! De bini auso uf die Site im Internet los. Läck, die Schrifte wo's dert het – eifach wahnsinnig! I ha aus gfunge. Tierli, Mönsche, Ortschafte, Fuessspure, etc. Nume nid üsi Schrift. Auso witer im Internet. Google isch doch no guet. Versuechi haut dert mau unger "Schriftart suchen". Hei super, grad 62'500 Sitene git's daderzue. Da wird wou ä bruchbari derbi si. I auso derhinger. Irgendeinisch hani de eini gfunge, wome mit Teili vo dr Schrift, wo me suecht, cha usefinge, weli dasses chönnt si... I auso üse Schriftzug iscännet, Teile i mim Biudbearbeitigsprogramm freigschteut u das när ufeglade. Mischt! Äs het zwar äs paar ähnlechi Schrifte gha, aber nid üsi ! Tja, ir Zwüschezyt hani nümm gluegt, wie lang, dass i scho gsuecht ha, aber i ha eifach nid so schnäu wöue ufgäh!!! Drum hani üsi Schrift nomau chlei gneuer bearbeitet u nomau ufeglade u... Yeah! Yes! Ja! Geil! So guet! Eifach geniau! I ha se!!!!!!!!!!!!!!!!!!!! Äs het üsi Schriftart würklich usegspöit ☺ Lazybones... heisst si und isch ä Schrift, wo me nume cha choufe u nid eifach gratis abelade... Tja, u so hani de ändlich mini Rueh gfunge, ha wieder chönne schlafe, schaffe, mitem Hung ga loufe, mit mire Familie rede u sogar Rock'n'Roll tanze!!! Dir gseht auso, nume nid ufgäh, egau was me macht oder wott erreiche. Mängisch bruchts haut eifach Zyt, Närve u Geduud, aber äs lohnt sich ☺ I däm Sinn, häbit viu Spass bi üsem Heftli, ob itz mit "Arial", "Times New Roman" oder "Lazybones" gschriebe, isch ja egau, Houptsach äs fägt. Ä liebe Gruess vom Hene 9